उच्च प्रशासकको करामत, कापी जाँच्दै छोरी र पत्नीलाई पास *. पूर्व शिक्षा

काठमाडौं, आश्विन २६ - उच्च प्रशासकहरू आफन्तलाई निजामती सेवामा प्रवेश
गराउन पद र पहुँचको कतिसम्म दुरुपयोग गर्छन् भन्ने उदाहरण बनेका छन्,
पूर्वशिक्षा सचिव रामस्वरूप सिन्हा र शिक्षा मन्त्रालयका बहालवाला सहसचिव
सूर्य गौतम । सिन्हाले छोरी अन्तिमाकुमारी र गौतमले पत्नी इन्दिरालाई
लोकसेवाले हालै लिएको शाखा अधिकृत (विद्यालय निरीक्षक) पदको परीक्षाको
कापी आफैंले जाँचेर उत्तीर्ण गराएको खुलासा भएको हो ।
गैरकानुनी रूपमा सिन्हा र गौतमले छोरी र पत्नीलाई उत्तीर्ण गराउन
प्रश्नपत्र परिमार्जनमा बसेको र आफैंले उत्तरपुस्तिका जाँची
उत्तीर्णगराएको अनुसन्धानबाट खुलेपछि लोकसेवाले बिहीबार दुवै जनाको
परीक्षा रद्द गरेको छ ।
लोक सेवा आयोग कार्यसञ्चालन निर्देशिका २०६७ को अनुसूची १९ को उत्तर
पुस्तिका परीक्षण गरी पठाउने अनुरोधपत्रको बुँदा नं. ८ मा परीक्षणकर्ताको
नातेदारले परीक्षा दिए सिलबन्दीरूपमा उत्तरपुस्तिका परीक्षण नगरी फिर्ता
गर्नुपर्ने प्रावधान छ । 'त्यो थाहा हुँदाहुँदै सिन्हा र गौतमले कानुनले
लगाएको बन्देजको उल्लंघन गर्दै छोरी र पत्नीलाई उत्तीर्ण गराउन आफैंले
उत्तरपुस्तिका जाँचे,' लोकसेवाका एक अधिकारीले भने ।
उनका अनुसार सिन्हा र गौतम छोरी र पत्नीलाई उत्तीर्ण गराउन नियतवश
प्रश्नपत्रको परिमार्जनमा समेत संलग्न थिए । गौतम त्यस्ता व्यक्ति हुन्,
जसलाई परीक्षा नियन्त्रण कार्यालयको निर्देशक हुँदा एसएलसी परीक्षाको
नतिजा प्रकाशन पद्धतिलाई व्यवस्थित गराएबापत सरकारले अघिल्लो वर्ष २ लाख
रुपैयाँ राशिको सबभन्दा ठूलो निजामती पुरस्कारसमेत दिएको थियो ।
उनीहरूले 'नियतवश नै उत्तरपुस्तिका परीक्षण गरेको भन्ने अर्थ गर्न सकिने
अवस्था रहेको र प्रश्नपत्र परिमार्जनमा समेत संलग्न रहेबाट नियत सफा
नरहेको' भन्दै आयोगले सूचना जारी गरी अन्तिामाकुमारी र इन्दिराको परीक्षा
रद्द गरिएको जनाएको हो । आयोगले पूर्वसचिव सिन्हा र सहसचिव गौतमलाई
कारबाही गरी कालोसूचीमा राखेको लोकसेवाका सहप्रवक्ता रविलाल पन्तले
जानकारी दिए ।