भारतको एटिएमबाट लाखौँ निकाल्नेसँग ३२ लाख धरौटी

काठमाडौँ, वैशाख २७ (नागरिक)- कुनै आधिकारिक व्यापार व्यवसाय नभएको भारतीय नागरिक जितेन्द्रकुमारले नेपालका वैंकहरुमा रकम जम्मा गरी भारतबाट लाखौ रुपियाँ एटिएमबाट निकालेको अभियोगमा विशेष अदालतले ३२ लाख धरौटी माग गरेको छ।
विशेष अदालतका अध्यक्ष न्यायाधीश गौरीबहादुर कार्की तथा सदस्य न्यायाधीशद्वय ओमप्रकाश मिश्रर केदारप्रसाद चालिसेको इजलासले सम्पति शुद्धिकरण ऐन अन्तर्गत चलको मुद्दाको सुनुवाई गर्दै आज थुनछेकको आदेश दिएको हो।
उनले विदेशी मुद्रा अपचलनमा संलग्न रही इजाजत वेगर विदेशी विनिमय कारोवार गरी विभिन्न व्यक्तिका एटीएम कार्डको अनधिकृत प्रयोग गरी ४ करोड १६ हजार २३३ रुपियाँ कारोबार गरेको देखिएको आदेशमा उल्लेख छ।
प्रतिवादीले कसूर इन्कार गरे पनि उनीबाट उनको नाममा जारी भएको तीन थान र अन्य व्यक्तिहरुको नाममा जारी भएको १९ (उन्नाइस) थान एटीएम कार्ड र नेपाली रुपियाँ तीन लाख ४३ हजार ७५० समेत बरामद भएको थियो।
उनको नाममा खोलिएको नेपाल एस.बि.आई. वैंक र राष्ट्रिय वाणिज्य वैंकमा रहेको खातामा विभिन्नमितिमा रकम जम्मा गरी सो रकम एटीएम समेतको प्रयोगवाट निकालेको देखिएको थियो।
कारोवार गरेको उक्त रकमको वैधानिक श्रोतबाट आर्जन गरेको भनि प्रतिवादीले प्रमाण दिन सकेको नहुंदा निज प्रतिवादी जीतेन्द्र कुमारले दावीकोकसूर गरेको होइन भन्न सकिने अवस्था तत्काल नदेखिएको र यो विवाद वैंकिङ्ग कसूर सम्वन्धी नभई सम्पत्ति शुद्धीकरण सम्वन्धी भएको, निजको नामको वैंक खातामा रहेको र बरामद रकमसम्मको वैधानिक श्रोतको पुष्टि हुन नसकेकोले वुझ्दै जाँदा ठहरे बमोजिम हुने गरी हाल निजको कारोवारको रकम ३२ लाख १० हजार बराबरको जेथा वा वैंक ग्यारेण्टी माग गर्ने फैसला अदालतले गरेको छ।