त्रिशूलीमा बेपत्ता किशोरकिशोरी फेला परेनन्

चितवन, असार ४ - दारेचोक ३, कुरिनटारस्थित त्रिशूली नदीमा बगेर बेपत्ता
भएका ५ जना किशोरकिशोरी ३ दिन बितिसक्दा पनि अझै फेला पर्न सकेका छैनन् ।
बेपत्ताको खोजी कार्यकालागि सोमबार बिहानबाट सशस्त्र प्रहरी बल विपत्
व्यवस्थापन तालिम केन्द्र कुरिनटारका प्रहरी नदीमा परिचालन गरिएको भए पनि
फेला पार्न नसकिएको केन्द्रका डीएसपी दीपेन्द्र गिरीले बताए । सशस्त्र
प्रहरी र जनपथ प्रहरीका विभिन्न ४ वटा समूह खोजीमा खटिएका छन् ।
त्रिशूलीमा पानीको बहाव धेरै भएकाले खोजीमा कठिनाइ
भएको खोजी कार्यमा संलग्न प्रहरीले जनाए । खोजी कार्यमा विपत व्यवस्थापन
तालिम केन्द्रका सशस्त्र प्रहरी र जिप्रका चितवनका ५ दर्जनभन्दा बढी
प्रहरी खटिएका छन् । उनीहरूको खोजीका लागि सोमबार दिनभर घटनास्थलबाट
देवघाटसम्म खोजे पनि फेला पार्न नसकिएको प्रहरीले जनाएको छ । शनिबार
भरतपुरबाट कुरिनटार घुम्न गएका ४ किशोरी र १ किशोर पौडी खेल्ने क्रममा
नदीमा बगेर बेपत्ता भएका थिए । बेपत्ता हुनेमा भरतपुर ५ स्थित सापकोटा
चोकका रजनी रेग्मी, लिजा रेग्मी, मोनिका रेग्मी, अस्मिता थापा र नारायणगढ
बेलचोकका जनक राउत छन् । बेपत्ता भएसँगै परिवार भावविह्वल छन् । source
ekantipur.com