एसएलसीको खुशीमा मिठाइ बाँड्न निस्केकी किशोरीको मृत्यु

काठमाडौं, असार ३ (नागरिक)- सवारी दुघर्टनामा एसएलसीमा उत्तीर्ण भएको खुसीयालीमा चकलेट बाँड्दै हिँडेकी एक परीक्षार्थीको मृत्यु भएको छ। जोरपाटीमा शुक्रबार भएको दुघर्टनामा रेन्की तामाङको मृत्यु भएको हो। एसएलसीमा फर्स्ट डिभिजनमा उत्तीर्ण उनी आफन्तलाई लड्डु बाँडेर फर्कंदा बा३५प ६०१३ नम्बरको मोटरसाइकलमा बसेकी थिइन्।
मोटरसाइकल सूर्यसिंह तामाङले चलाएका थिए। मोटरसाइकललाई बा१ख ५०३५ नम्बरको पानीट्यांकरले ठक्कर दिँदा उनी उछिट्टिएर ट्यांकरको चक्कामा परेकी थिइन्। चालक तामाङ भने घाइते भएका थिए।
रेन्कीको मृत्युपछि स्थानीयले ट्याङकर जलाइदिएका थिए। आगो निभाउन आएको दमकल र प्रहरीमाथि समेत उनीहरूले आक्रमण गरेपछि प्रहरीले अश्रुग्यास हानेको थियो। स्थानीयसँगको झडपमा दुई प्रहरी घाइते भएका थिए।