ललितपुर र सप्तरीमा भएको दुर्घटनमा ४० घाइते

काठमाडौ, वैशाख २७ - ललितपुरको लेलेमा बुधबार बिहान कलेज बस दुर्घटना हुँदा बीस जना विद्यार्थी घाइते भएका छन् ।
बिद्यार्थी लिएर आउँदै गरेको लगनखेल स्थित निम्स कलेजको बा २ ख ५५१० नम्बरको बस देवीचौर १ मा सडकमै पल्टिएको प्रहरीले जनाएको छ ।
घाइते विद्यार्थीको स्थानीय आनन्दवन अस्पतालमा उपचार भइरहेको महानगरीय प्रहरी चापागाउँका सहायक निरीक्षक नरेस रावलले जानकारी दिए ।
रासस का अनुसार सप्तरीमा पूर्व-पश्चिम लोकमार्गअन्तर्गत ठेलिया-१ स्थित बेङगरीको मिलन चोकमा आज भएको दुर्घटनामा २० यात्रु घाइते भएका छन् ।
काठमाडौँबाट झापा जाँदै गरेको ना४ख ५६४५ नम्बरको यात्रुबाहक मितेरी बसले आज बिहान छ बजे ट्रयाक्टरलाई पछाडिबाट ठक्कर दिादा उनीहरु घाइते भएका हुन् ।
घाइतेमध्ये बसका कन्डक्टर विजय अधिकारीको अवस्था निकै गम्भीर रहेको इलाका प्रहरी कार्यालय कञ्चनपुरले जनाएको छ ।
बेहोस अवस्थामा रहेका अधिकारीसहित १० जना घाइते यात्रुलाई तत्कालै उपचारका लागि विराटनगर पठाइएको छ । अन्य घाइतेको स्थानीय क्लिनिकमा उपचार भइरहेको छ ।
ठक्कर दिने बस, ट्रयाक्टर र चालक इलाका प्रहरी कार्यालय कञ्चनपुरको नियन्त्रणमा रहेको छ ।
प्रकाशित मिति: २०६९ वैशाख २७ ११:५७