'बर्थ डे' मनाउन गएकी युवती सुन्दरीजलमा खसेर बेपत्ता

काठमाडौँ, साउन २१ (नागरिक)- साथीको जन्मदिन मनाउन खोलामा घुम्न गएकी एक २० वर्षीया युवती चिप्लेर खोलामा खसी बेपत्ता भएकी छिन्। बेपत्ता भएको २४ घण्टा नाघिसक्दा पनि उनको पत्ता लाग्न सकेको छैन।
प्रहरीका अनुसार जोरपाटी-७ आरुबारी बस्ने २० वर्षीया उषा श्रेष्ठ शनिबार दिउँसो २ बजेर ४० मिनेट जाँदा सुन्दरीजल-९ स्थित खोलामा खसेर बेपत्ता भएकी हुन्।
सोही ठाँउ बस्ने हिरामणी नेपाल र सुगन कार्कीसँग नेपालको जन्म दिन मनाउने क्रममा खोलामा घुम्न गएको अवस्थामा चिप्लेर उनी खोलामा खसेको प्रहरीले बताएको छ।
त्यसैगरी कैलालीमा रामशिखर झाला-८ बस्ने बिष्णु वोगटीकी १४ वर्षीया छोरी पानकला बोगटी हिजो दिउँसो साढे ३ बजे कान्द्रा नदीले बगाएर बेपत्ता भएकी छिन्।
त्यस्तै बाँकेको वेतहनी-९ बस्ने ३५ बर्षीय भोला खटिक राप्ती नदीको किनारमा दाउरा निकाल्ने क्रममा हिजो दिउँसो २:४० मा खोलाले बगाएर बेपत्ताभएका छन्।
नवलपरासीको सनही-४ मधवलीया बस्ने संजय पाठकको १० बर्षीय छोरा श्याम पाठक हिजो दिउँसो १ बजे हुकई-३ स्थित राम खेण्डवा खोलामा नुहाउने क्रममा खोलाले बगाएर बेपत्ता भएका छन्।