प्रधानमन्त्रीको गाडी विपक्षी युवा र विद्यार्थीले कालो झण्डा देखाउँदै रोके

मधुसुदन गुरागाइँ, बनेपा, साउन ३०- काठमाडौँ विश्वविद्यालयको सभामा सहभागी हुन गइरहेका प्रधानमन्त्री तथा विश्वविद्यालयका कुलपति बाबुराम भट्टराईको 'कारगेड' नै रोकिन बाध्य हुने गरी विपक्षी विद्यार्थी र युवाले बनेपाको तीनदोबाटोमा कालो झण्डा देखाउँदै विरोध प्रदर्शन गरेका छन्। विरोध प्रदर्शनका क्रममा एक जना विद्यार्थीलाई प्रहरीले नियन्त्रणमा लिएको छ।
प्रधानमन्त्री बनेपा आउने खबर पाएपछि उनीहरुले बिहानैदेखि प्रदर्शनको तयारी गरेका थिए। बनेपामा मात्रै तीन स्थानमा प्रधानमन्त्रीलाई कालो झण्डा देखाइएको थियो। विपक्षी विद्यार्थी र युवा संगठनहरु प्रधानमन्त्रीले राजीनामा दिनुपर्ने माग राख्दै आन्दोलनमा छन्।